سودا مىنىستىرلىقى چارشەنبە كۈنى ئېلان قىلغان سانلىق مەلۇماتقا قارىغاندا، بۇ يىلنىڭ دەسلەپكى ئىككى ئېيىدا جۇڭگونىڭ مۇلازىمەت سودىسى ئوخشاش مەزگىلدىكىدىن %33.5 ئېشىپ، 953 مىليارد 480 مىليون يۈەن (149 مىليارد 700 مىليون دوللار) غا يەتكەن.

مىنىستىرلىقنىڭ توردا ئېلان قىلغان باياناتىدا كۆرسىتىلىشىچە، يانۋاردىن فېۋرالغىچە بولغان مەزگىلدە مۇلازىمەت ئېكسپورت سوممىسى 467 مىليارد 580 مىليون يۈەن بولۇپ، يىللىق نىسبەتتە %39.4 ئاشقان، مۇلازىمەت ئىمپورت سوممىسى 485 مىليارد 900 مىليون يۈەن بولۇپ، يىللىق نىسبەتتە %28.3 ئاشقان.

ئىككى ئايلىق مەزگىلدە مۇلازىمەت سودىسى ئېكسپورتىنىڭ ئېشىشى ئىمپورتنىڭكىدىن 11.1 پىرسەنت پوئىنت ئېشىپ كەتكەنلىكتىن، مۇلازىمەت سودىسىنىڭ قىزىل رەقىمى %57.6 تۆۋەنلەپ 18 مىليارد 310 مىليون يۈەنگە يەتتى، بۇ ئۆتكەن يىلنىڭ ئوخشاش مەزگىلىدىكىدىن 24 مىليارد 910 مىليون يۈەن ئاز.

مىنىستىرلىكنىڭ سانلىق مەلۇماتلىرىغا قارىغاندا، بۇ يىلنىڭ دەسلەپكى ئىككى ئېيىدا بىلىم تەلەپ قىلىدىغان مۇلازىمەت سودىسى 382 مىليارد 400 مىليون يۈەنگە يېتىپ، يىللىق نىسبەتتە %17.9 ئاشقان.

بۇ ئارىلىقتا، ساياھەت مۇلازىمىتى سودىسى ئوخشاش مەزگىلدىكىدىن %16.9 ئېشىپ، 149 مىليارد 770 مىليون يۈەنگە يەتتى.